قصيدة خارج النص .. عن موقف في الماسنجر (الجميع يدخل)

--------------------------------------------------------------------------------

هذه قصيدة جديدة لي ..
وهي بعد موقف حدث لي في الماسنجر ..

وأبي رأي الجميع ( الأعضاء والعضوات )
وبدون مجاملات ... إذا حلوه أو حتى إذا ما عجبتكم ..
تراني منكم وفيكم وأتقبل أي شي ...
وأبي كل واحد يظهر موقفه من الموضوع ..

وأهم شي توصل الرسالة ..
أترككم مع القصيدة .. وبانتظاركم ..

جتني إضافة في المسنجر قبل يوم
ودارت على بالي أمورٍ كثيرة

من يا ترى هذا .. ومن وين بيروم
يحصل على الإيميل أو يستعيره

قلت المهم أستقبله قبل لا لوم
نفسي .. عسى يبغي كفوفٍ نصيرة

قالت: ... وقلت: العفو منك يا قيوم
ما غير بنتٍ ... قلت: يدّي قصيرة

قالت: أجل هيبة ملك أنت مزعوم
قلت : الملوك بوسط كفّي أسيرة

ما هان قدري لو على السيف محكوم
وفي نظرتي كل العظايم صغيرة

لكن أبسأل وأنشد أخبار وعلوم
ومن وين إيميلي عرف خط سيره ؟

قالت كذا : * من منتدى الروح دت كوم *
قلت : الإسم ما شفت أصلا نظيره

أعرف شعورٍ عاش بي يعتلي دوم
روحين تسكن شاعرٍ في ضميره

*روحي* و *روح عمان* من طيبة عزوم
أسوم روحي لجل تبقى كبيرة

ولو أفقد الروحين ماني بمظلوم
يكفي سقتني طيب يزهى عبيره

قالت : كلامك بالعطر دوم مختوم
ودوم الأسد شامخ بعالي زئيره

شكل الشعر في داخلك برق وغيوم
وأخاف يمطر ثم يعلى هديره

قلت : الشعر وجدان بالحرف مرسوم
ولو ما كتبته كن عيني ضريره

قالت : أجل سمّعني اليوم منظوم
قي وصف حسني أو عيوني الخطيرة

قلت : إقصري يا بنت .. فالقلب محشوم
عن ما يجرّه للخطأ أو سعيره

قالت : علامك يالملك .. قلت ملزوم
شعري يطابق مبدئي في مسيرة

قالت : أبيك فسالفة قبل لا تقوم
قلت :أسمعك ... يا جعل ف الأمر خيره

قالت : أحس بداخلي طير بيحوم
ومحتاج غصنٍ يحتويه ويجيره

قلت : إسمعي راعي الإبل دوم مظلوم
ولا يفهم بأحزانه إلا بعيره

ومني نصيحة... إلزمي القلب في صوم
عن هالأمور وكل ما به جريرة

وبثي شعورك للذي يفهمه دوم
أمك وأبوك وأختك المستنيرة

ولا صديقاتك حشا ما بهم سوم
ومن لا يحبك ما عطاك السريرة

والحزن يكشف غمّته خالق يروم
يعطي السعد من طاب فعله وخيره

ولا لا يضيق بخاطرك يوم مشؤوم
لن الفرج ياتيك في يوم غيره

ومني العذر لني كذا دوم محكوم
بأخلاق تمشي وفق نفس الوتيره

وفرصة سعيدة وصادق الشعر مختوم
*القلب ينزف بس نفسي كبيرة *

أعتذر إذا لم تعجب البعض ولكن هي مجرد محاولة ... وقد تصيب أو تخطىء ..
وطبعا منكم نستفيد ..... وبانتظاركم ... مودتي ووردي ...